'Rwan mae'r ffigyrau hyn yn ymddangos yn sylweddol - ac mae'r £75m (o bosibl) fydd gan y sianel yn weddill o refeniw blynyddol ar ddiwedd y cyfnod yn dal i ymddangos i'r llygaid lleyg yn dipyn go lew o bres. Ond sut ydi refeniw felly yn edrych yng nghyd destun y sefyllfa Brydeinig yn ei chyfanrwydd? Mae'r tabl isod yn rhoi syniad o refeniw'r darlledwyr Prydeinig.
| B Sky B | £5.9bn |
| BBC | £3.6bn |
| ITV (2009) | £1.9bn |
| Channel 4 | £0.83bn |
| Channel Five | £0.27bn |
| S4C | £0.1bn |
Mewn geiriau eraill mae refeniw S4C yn 0.8% o refeniw y chwech prif gorfforaeth darlledu. Mae gwariant BSkyB ar hysbysebu eu cynnyrch yn sylweddol uwch nag ydi holl refeniw S4C - (£127m yn 2007). Mae BSkyB mewn sefyllfa i wario tua £1bn y flwyddyn ar chwaraeon - deg gwaith cyfanswm gwariant S4C ar hyn o bryd. Maent yn gwario £278m ar ffilmiau. Mi fydd cyfran S4C o'r refeniw yn lleihau os ydi'r toriadau sy'n cael eu hystyried yn cael eu gwireddu - gan o bosibl gyrraedd 0.5% neu lai o'r cyfanswm Prydeinig.
'Dwi'n sylweddoli fy mod yn gwneud cymhariaeth ychydig yn gamarweiniol gan bod y pum darlledwr arall yn darlledu ar hyd a lled y DU, yn hytrach nag yng Nghymru yn unig. Ond mae S4C yn cystadlu yn y farchnad Brydeinig ehangach - mae'r cwbl ohonom sydd ar gael i S4C fel gwylwyr hefyd ar gael i'r sianeli eraill.
Mae S4C yn ei chael yn anodd i gystadlu ar hyn o bryd. Y sianel ei hun sy'n gyfrifol am rhai o'r ffactorau sy'n gyrru hyn, ond mae rhai ffactorau pwysig y tu hwnt i'w rheolaeth - yn arbennig felly y ffaith eu bod yn bysgodyn bach mewn pwll hynod o fawr a ffyrnig o gystadleuol. Canlyniad glastwreiddio presenoldeb S4C ymhellach yn y cwiltwaith ehangach fydd cyfyngu ymhellach ar allu'r sianeli i gystadlu - a rhoi hergwd go arw iddi tuag at ei thranc.
Data o datablog
1 comment:
Digon gwir. Mae'n bwysig nodi wrth gwrs fod y BBC yn cyflenwi sawl gwasanaeth teledu (gyda gwasanaeth 'rhanbarthol' iddynt), ditto radio.
Ond yr hyn sydd yn wir yw fod disgwyl gan y gwylwyr (a'r gwleidyddion) fod S4C yn cynnig arlwy tri neu bedwar sianel BBC mewn un sianel. Ymhellach, mae disgwyl iddynt gael safonnau golygu a chynhyrchu y BBC gyda chydieb llai nag hanner un Channel 5.
At hynny, gellid ychwanegu fod peth wmbreth o gynnyrch C5 yn stwff o America sydd wedi ei brynu fewn. Dydy'r ffigurau ddim gen i, ond faswn i'n barod iawn i ddweud fod yn agos at 90% o gynnyrch S4C yn raglenni sydd wedi eu comisiynnu'n uniongyrchol gan y rhaglen - canran lot uwch na C5, C4a'r BBC hyd yn oed.
Hynny yw, mae'n costio fwy i gael sianel yn y Gymraeg achos dydy'r opsiwn o brynu ac yna isdeitlo/trosleisio stwff tramor Americanaidd (fel gall teledu Basgeg neu Gatalaneg neu Iseldireg am wn i wneud) ddim ar gael. Wneith siaradwyr Cymraeg ddim gwylio rhaglen Saesneg wedi ei drosleisio (er, gellid cael telenovas o Brasil wedi eu trosleisio ... bydde hynny'n sbri!).
Rhaid felly comisiynnu gwaith gwreiddiol. Dyna un rheswm pan fod cyfraniad S4C i economi Cymru'n bwysig ac fod gan Gaerdydd y staff a'r gallu i gynnal pethau fel Dr Who maes o law.
Macsen
ON - Fel dywed y Quixotic Quizling ar ei flog rhyw dro, does dim rheswm pan na all S4C isdeitlo rhai cyfresi o'r cyfandir e.e. fel gwelir o'r gyfres dditectif Swedeg sydd ar BBC4, Wallander.
Post a Comment