Aelodaeth y pleidiau gwledyddol

Mae'n ddiddorol nodi o flog Michael Crick bod aelodaeth y Toriaid a'r Lib Dems wedi syrthio yn sylweddol tros y flwyddyn ddiwethaf.

Mae ffigyrau Crick fel a ganlyn:

Lib Dems 48,934
Llafur 193,000
Toriaid 130,000 (er eu bod nhw yn gwrthod datgelu eu ffigyrau yn swyddogol)
SNP 23,376
UKIP 17,184

Dydi Crick ddim yn dweud wrthym beth ydi ffigyrau'r Blaid - ond 7,863 oedd yr aelodaeth ym mis Ionawr.

Mae'n anodd cymharu ffigyrau'r pleidiau unoliaethol a rhai'r pleidiau cenedlaetholgar oherwydd bod y rhan fwyaf o aelodau'r pleidiau unoliaethol yn byw yn Lloegr. Ond os ydym yn cyfrifo cymhareb poblogaeth:aelod gan ddefnyddio poblogaeth y DU ar gyfer cymarebau'r pleidiau unoliaethol a phoblogaethau'r gwledydd Celtaidd ar gyfer y Blaid a'r SNP, dyma'r darlun:

Lib Dems 1:1,280
Llafur 1:324
Toriaid 1:481
SNP 1:224
UKIP 1:3,645
Plaid Cymru 1:389

Felly'r SNP sy'n perfforio orau o ddigon ar y mesur hwn, gydag UKIP efo llai nag un aelod am pob 3,000 o bobl a'r Lib Dems efo llai nag un am pob mil. Dydi'r Blaid ddim yn gwneud yn ddrwg o gwbl.

UKIP i gael seddi ar Fai 5?

Y ffaith mwyaf diddorol i godi o'r pol YouGov diweddaraf, ag eithrio'r gwymp ym mhleidlais Llafur ydi'r twf ym mhleidlais UKIP yn y rhanbarthau - maent ar 7% - union ganran y Lib Dems.

Petai'r ffigwr hwnnw'n cael ei wireddu byddai'n sicr y byddai'r blaid wrth Gymreig, asgell dde yn ennill seddi. Yn wir, petai eu pleidlais wedi ei ddosbarthu y fwy cyson nag un y Lib Dems - ac mae yna beth lle i gredu y gallai hynny fod yn wir, yna gallent gael mwy o seddi na phlaid Kirsty Williams.

UKIP a'r BNP pa mor wahanol?

‘Dydi UKIP ddim at ddant llawer ohonom. Mewn ambell i ffordd maent hyd yn oed yn fwy anymunol na’r blaid adain dde arall honno – y BNP. Er gwaethaf yr hiliaeth sydd ymhlyg ym mhob agwedd o fodolaeth y blaid honno, a’r amrediad eang o bolisiau cyfangwbl dwlali maent yn eu coleddu (rhoi AK47 i bawb sydd eisiau un, neu godi trethi i gyd trwy drethu gwariant) o leiaf mae’r blaid fach anymunol yma yn cydnabod bodolaeth y gwledydd Celtaidd ac yn credu mewn datganoli. Erbyn meddwl roedd Hitler yn ffeind iawn efo’i gi hefyd yn ol pob son. Ta waeth, ‘dwi’n crwydro – stori arall ydi honno.

‘Dydi UKIP ddim hyd yn oed yn cydnabod bodolaeth y gwledydd Celtaidd, a phetaent yn ennill grym yn Llundain byddant yn mynd at i gael gwared o’r senedd dai datganoledig – er gwaethaf y ffaith bod pobl y gwledydd Celtaidd wedi pleidleisio trostynt. Ymddengys ein bod wedi cael ein twyllo i bleidleisio fel y gwnaethom gan Ewrop fel rhan o gynllwyn enfawr i ddifa cyfundrefn lywodraethol draddodiadol y cyfandir.

Ond mi rydan ni i gyd yn gwybod o’r gorau fod UKIP yn llawer mwy parchus na’r BNP – ‘does ganddyn nhw ddim problem efo hiliau eraill wrth gwrs – mae’r ynys yn rhy llawn i gymryd yr holl bobl ‘da chi’n gweld – ac mae mewnfudo yn rhan o’r hen gynllwyn Ewropiaidd ofnadwy ‘na. Dim byd i’w wneud efo hen hiliaeth dosbarth gweithiol y BNP. Dim o gwbl. Dim.

A dyna ni eu hymgeiswyr a’u haelodau wrth gwrs. Mae pawb mae’n debyg gen i yn sylweddoli bod aelodau ac ymgeiswyr UKIP yn hollol wahanol i’r casgliad rhyfeddol o bobl sy’n sefyll ar ran y BNP – pobl fel Nick Erikson, David Lucas a Joseph Owens er enghraifft.

Cymerer er enghraifft eu darpar ymgeisydd ar gyfer etholiadau San Steffan ym Merthyr a Rhymni, Adam Brown. Mae Adam, sy'n gynghorydd tros y Gurnos, bellach yn cael mynychu gemau pel droed wedi cyfnod o 2000 i 2003 pan gafodd ei wahardd o pob cae pel droed ym Mhrydain yn dilyn cyfres o ddigwyddiadau tra anffodus yn ystod gem rhwng QPR a’r Blue Birds.

’Ifanc a naïf‘ oedd Adam yn ol ei dystiolaeth ei hun. Mor wahanol i’r Adam cyfredol sy’n cael ei roi gerbron etholwyr Merthyr a Rhymni. Y llynedd cafodd ei hun mewn mymryn o ddwr poeth oherwydd iddo lawnsio pol rhyngrwyd awgrymog iawn oedd yn ymwneud a’r llofruddwraig Americanaidd enwog Amanda Knox. Teitl y pol oedd Amanda Knox. Would you _ _ _?.

Mae Adam yn honni bod ganddo gyfaill arbennig iawn mae hefyd yn ei gyflogi o’r enw Mr Ninian ('does yna neb ond Adam yn gwybod pwy ydi Mr Ninian), ac mae Mr Ninian yn llawn syniadau gwreiddiol a diddorol ynglyn a sut i ennill etholiadau. Er enghraifft, mae’n tynnu sylw defnyddwyr y wefan cardiffcity.com at y posibiliadau o wneud ceiniog neu ddwy ar y We trwy fetio tros Adam yn yr etholiad ar yr 80/1 (crintachlyd braidd yn fy marn i) mae Paddy Power yn ei gynnig am fuddugoliaeth i Adam, ac wedyn mynd at i bleidleisio trosto ym mis Mai.

A dyna wrth gwrs sy’n gwneud UKIP mymryn yn fwy derbyniol na’r BNP – ansawdd uchel eu haelodau a'u hymgeisyddion.

Araf y ticia'r cloc yr oriau meithion _ _ _ _

'Dydi'r blog yma ddim yn ymdrin a Llais Gwynedd yn aml iawn - ond un o'r pleserau o wneud hynny ydi bod ymateb i'w gael - weithiau o fewn eiliadau i gyhoeddi blogiad.

Yn anffodus 'dwi'n dal i ddisgwyl ymateb i fy ngwahoddiad i'r cyfryw blaid awgrymu'n gynnil i'w cefnogwyr beidio a bwrw pleidlais tros UKIP yn etholiadau San Steffan 2010. Ta waeth, 'dwi'n ddyn amyneddgar ac mi allaf ddal i drio a dal i ddisgwyl.

Mae gan UKIP pob hawl i'w barn wrth gwrs, a fi ydi'r cyntaf i ddadlau y pwysigrwydd iddynt gael lleisio'r farn honno. Ond mae eu barn yn un rhyfeddol o wrth Gymreig - 'dydyn nhw ddim hyd yn oed yn derbyn bod Cymru'n wlad, ac maent yn awyddus iawn i gau'r Cynulliad Cenedlaethol. Yn wir byddant yn sefyll yn etholiadau 2011 ar sail eu bwriad i ddychwelyd i'r hen drefn o lywodraethu Cymru'n uniongyrchol o San Steffan. Petai rhywun yn dadlau y dylid diddymu San Steffan a rheoli'r DU yn uniongyrchol o Frwsel 'dwi'n rhyw feddwl y byddai UKIP eisiau ei roi yn erbyn wal a'i saethu am frad - ond stori arall ydi honno.

'Rwan 'dwi ddim eisiau gwybod sut mae neb yn fotio, ond mi fyddwn i'n hoffi gofyn yn garedig a chyfeillgar os ydi Llais Gwynedd yn gallu perswadio nhw eu hunain i argymell i'w cefnogwyr beidio a phleidleisio i UKIP.

'Dydi hyn ddim yn anodd iawn.