Mae'r Comisiwn Ffiniau wedi cyhoeddi eu cynigion drafft diweddaraf ar gyfer Cyngor Gwynedd. Mae'r nifer cynghorwyr yn syrthio o 75 i 69. 'Dwi'n bwriadu cymryd cip ar y newidiadau yn Arfon, Dwyfor a Meirion tros y dyddiau nesaf, gan ddechrau efo Arfon.
Y peth cyntaf i'w nodi mae'n debyg ydi'r gyflafan ym Mangor gyda nifer y cynghorwyr yn disgyn o ddeg i chwech. Mae yna or gynrychiolaeth wedi bod yn y ddinas ers cryn gyfnod gyda ambell i gynghorydd yn cael ei ethol efo nifer cymharol fach o bleidleisiau - ymhell o dan 100 mewn ambell i achos.
Un enghraifft o hyn ydi'r argymhelliad isod i uno ward dau gynghorydd Menai efo ward un cynghorydd Garth i greu un ward un aelod.
Bron mor drawiadol ydi'r datblygiadau ar yr ochr arall i'r ddinas gyda Marchog (Maes G i bob pwrpas) yn colli un o'i ddau aelod.
Mae pethau'n mynd i'r cyfeiriad arall yn Nyffryn Ogwen gyda wardiau un aelod Bethesda a Gerlan yn cael eu huno ac yn cael aelod ychwanegol.
Datblygiad diddorol rhwng Caernarfon a Bangor ydi'r hyn sy'n digwydd
yn ardal Felinheli / Bethel. Bethel ydi ward Sion Jones wrth gwrs.
Mae'r ddwy ward un aelod yn cael eu cyfuno i greu ward dau aelod. Mae'r
Felinheli gyda phoblogaeth llawer uwch nag un Bethel, ac mae'n gaer
etholiadol i Blaid Cymru ers blynyddoedd. Mae'n debyg bod cefnogaeth y
Blaid gyda'r uchaf yng Nghymru yn y rhan yma o lannau'r Fenai.
Mae yna nifer o newidiadau eraill yn Arfon - er bod y rhan fwyaf
ohonynt yn weddol fach. Un sy'n ddiddorol o bosibl ydi gwahanu pentrefi
cyfagos Rhostryfan a Rhosgadfan i'r gorllewin o Gaernarfon a'u lleoli
mewn wardiau gwahanol.
1 comment:
Sut mae pethau'n edrych ym Mangor bellach ? A wnaeth y blaid ddarganfod sut aeth pethau cymaint o'i le rhwng yr etholiadau lleol a'r etholiad cyffredinol ?
Post a Comment