Karen Robson - hogan fach neis

Mae'n debyg gen i na fydd y rhan fwyaf o ddarllenwyr y blog yma wedi clywed am Karen Robson, darpar ymgeisydd y Toriaid yng Nghanol Caerdydd. Mae ei phamffledi (uniaith Saesneg wrth gwrs) yn ei phortreadu fel athrawes fach neis iawn sydd o blaid gwell trafnidiaeth i'r hen a'r methedig, chware teg i fyfyrwyr, gwasanaeth hel sbwriel effeithiol ac ati.

Mae Karen hefyd yn hoff o wleidydda negyddol - fel y gallwch weld o'r pamffled uchod. 'Dydi o ddim fy lle fi i amddiffyn y Lib Dems wrth gwrs, ond mae'r cyfryw blaid wedi bod mewn grym yng Nghaerdydd ers blynyddoedd ac mae'n debyg bod y cynnydd o 18% yn nhreth y cyngor yn is na chwyddiant.

Ta waeth, os ydi Karen eisiau gwleidydda'n negyddol, iawn - mae'n rhan o'r gem (yn arbennig os mai'r Lib Dems ydi'r gwrthwynebwyr). Ond os ydi hi'n mwynhau y math yna o ymgyrchu efallai y dylai fod yn onest am y peth. Mae'n ufuddhau i'r gyfraith ac yn cydnabod mai'r Toriaid sy'n gyfrifol am yr ohebiaeth, ond yn gwneud hynny mewn ffont maint 3 eu 4. Lleiafrif bach o bobl all ddarllen ysgrifen mor fach heb gymorth chwyddwydr.

A ydych chi, fel y Lib Dems, yn gwrthod Satan a'i holl weithredoedd?

Mae'r ymdrech fach yma gan Lib Dems (pwy arall?) Canol Caerdydd yn ddigon diddorol. Yr hyn sy'n digwydd yma ydi propoganda etholiadol wedi ei wisgo fel holiadur.




Fel llawer o ddeunydd y Lib Dems mae wedi ei anelu'n benodol at un grwp o bobl - yn yr achos yma y myfyrwyr hynny sy'n byw yn nhai tamp Cathays yng nghanol y llygod, y pecynnau bwyd prydau cyflym sy'n chwythu trwy'r strydoedd, a sydd o bryd i'w gilydd i'w gweld yn baglu yn y tyllau enfawr sydd yn y lonydd ar eu ffordd adref o'r Gassy Jack's, Koko Gorillaz, y Pen & Wig a The End.

'Dydi myfyrwyr ddim yn hoff o ynni niwclear, tai gwael, landlordiaid barus, ffioedd myfyrwyr, newid hinsawdd, ail gylchu, yr asiantaeth dosbarthu benthygiadau na thoriadau mewn gwariant ar addysg bellach. 'Dydi'r Lib Dems ddim angen anfon holiadur i bawb i ddarganfod hyn - mae'n rhywbeth mae'r cwn ar balmentydd bler Cathays yn ymwybodol ohono.

Yr hyn sy'n digwydd wrth gwrs ydi bod geiriad yr 'holiadur' wedi ei roi at ei gilydd mewn ffordd sy'n awgrymu'n gryf bod y Lib Dems hefyd yn casau'r holl eitemau ar y rhestr. Mae hefyd yn rhoi'r argraff i'r sawl sydd ddigon gwirion i'w lenwi eu bod mewn cytundeb efo'r Lib Dems ar pob dim - er mai amrediad bach o faterion (mae pawb bron yn Cathays yn gytunedig ynglyn a nhw) sy'n cael eu codi mewn gwirionedd.

Mae hyn yn eithaf soffistigedig - yn sicr o gymharu a'r nadu anifeilaidd, di ystyr sy'n dod o gyfeiriad Lib Dems Aberystwyth, ond twyll ydi'r ymarferiad i gyd yn y pen draw. Tystiolaeth bellach o ddirmyg y Lib Dems tuag at yr etholwyr.